The Connexion | Speel Speel Slim - Onderwysersopleiding

Speel Speel Slim - Onderwysersopleiding

Speel-Speel Slim is ‘n prettige werkswinkel oor hoe om die kosbare voorskoolse jare te benut. Die eerste 6 jaar van ‘n kind se lewe is baie belangrik omdat dit di kritiese tyd is om die lyfie (sensories-motories), die emosies; sosialisering en denke te ontwikkel.

Het jy geweet? ‘n Baba het waarskynlik die meeste breinselle op sy eerste verjaardag? Daarna verdwyn ongebruikte breinselle teen ‘n tempo van 10 000 duisend selle per dag. Die getal breinselle is nie so belangrik as die getal konneksies tussen breinselle nie.

Hoe maak ons konneksies tussen breinselle?

Jy weet reeds dat die kleuter nuuskierig gebore is om sy eie lyfie, mense en dinge in sy omgewing te ontdek – ids hoekom hy nooit stil sit nie! Kleuters is gebore om te leer en leer beteken: ek maak konneksies tussen breinselle. Dit is waarom die kleuterfase die ideale geleentheid bied om spelenderwys en stresvry te leer hoe om te leer in voorbereiding vir grootskool.

Wat bteken SPEEL?

Speel beteken om self te ontdek. Die teenoorgestelde van speel is om gesê te word hoe om dinge te doen. Om ‘n kind te vertel hoe dinge werk en wat hy moet doen, is baie vinniger en makliker as om hom te los om self te ontdek. As mens egter daaraan dink dat ‘n kind ses jaar het om ‘n paar dinge te leer, het hy die wêreld se tyd om te leer deur self te ontdek. As ‘n kind leer deur self te ontdek, kry hy selfvertroue en voel hy slim. As hy nie self mag ontdek nie, leer hy om afhanklik te bly en voel minder slim en het minder selfvertroue.

Die kleuter kan nie alles self leer nie, hy het jou nodig ongeag of jy ‘n mamma, oppasser of kleuterjuffrou is, want Feuerstein het gesê ‘n kind het ‘n volwasse omgee-persoon nodig wat vir hom die wêreld ontsluit. Piaget sê ‘n kind het ook vastigheid nodig om te kan leer en ontwikkel – daardie vastigheid is jý wat met omgee die wêreld vir hom ontsluit. Wat ‘n kind ken, weet en voel hang van jou af. Jy is die een wat bepaal wát en óf ‘n kind leer. Wat jy nie vir ‘n kind leer nie, gaan die kind nooit weet nie.

Ons nooi jou uit om self weer ‘n kind te word wat nuuskierig is en wil ontdek. Ontdek ook watter harde werk speel eintlik is! Leer hoe om ‘n verskeidenheid leerervarings te skep sodat die kleuter sy lyfie, emosies en denke self kan ontdek. Aan die einde van Speel-Speel Slim sal jy ‘n kind se wêreld kan ontsluit met ‘n hart vol selfvertroue en ‘n kop vol kennis.

Ontdek hoe om 8 fassete van formele leer te ontdek:

Groot en fyn motoriek

Groot Motoriese Vaardighede verwys na die beweging en beheer van die groot spiere van die liggaam, soos wanneer ‘n kind stap, hardloop, skop, vang, spring, klim en gooi. Motories beteken beweging.

Fyn Motoriese Vaardighede verwys na die beweging en beheer van die klein spiere van die liggaam, soos wanneer ‘n kind verf, teken, knip, plak en legkaartbou.

Spraak en taalvaardighede

Taal- en spraakvaardighede is nie dieselfde ding nie. Spraak is die vermoë om klanke bymekaar te sit om woorde te vorm, terwyl taal die verstaan en regte gebruik van die woorde is.

Verbeelding en kreatiewe vaardighede

Fantasie is om sonder reëls of logika die verbeelding vrye teuels te gee en drome te droom. Kreatiwiteit is om planne te maak en dinge op ‘n nuwe manier te doen. Fantasie en kreatiwiteit moedig kinders aan om te dink en om iets met die nuwe plan te doen – dit vir ander te vertel of die plan uit te voer. Omdat die hand en die mond op dieselfde neurologiese baan in die brein is, stimuleer fantasie en kreatiwiteit die kind se vermoë om te dink en sy denke uit te druk.

Emosionele en sosiale vaardighede

Emosionele - en sosiale ontwikkeling is die basis van die kind se behoefte om te behoort en aanvaar te word (maatjies te hê). ‘n Positiewe selfbeeld en selfvertroue om met ander om te gaan is die direkte gevolg van ‘n goedontwikkelde lyf en ‘n positiewe belewenis daarvan.

Voorbereidende skrif en spelling

Skrif is meer as net letters in ‘n ry.Vaardighede soos persepsie, hand-oog koördinasie, fyn motoriese koördinasie, kreatiewe denke, redenasie en die herkenning van alfabetletters is nodig voor ‘n kind kan skryf.

Voorbereidende lees

Skryf is om op papier te praat. Lees is om te hoor wat op papier gesê was. Teken is ‘n vorm van skryf. Om te lees wat geteken is, is voorbereiding vir formele lees. Lees is dus die prentjies van die klanke wat ons praat.

Lees begin wanneer die kind sy maatjie, juffrou, oppasser of ouer vertel wat hy geteken het. Die storie verander dikwels as die kind dit vir meer as een persoon vertel. Dit is nie belangrik dat die storie dieselfde moet bly nie - dis belangrik dat die kind dink, sy gedagtes in prentjies verbeeld en dan weer kan herroep.

Syfervaardigheid en syfergeletterdheid

Wiskunde en syfergeletterdheid is alledaagse lewensvaardighede wat die kind dwarsdeur sy hele lewe gebruik. Wiskunde is een van die mees gevreesde vakke op skool en ‘n verpligte vak in die nuwe onderwysbenadering. Soos met lees en spel is een van die grootste probleme met wiskunde dat die basiese vaardighede wat ‘n kind help om wiskunde te kan doen, nie ontwikkel is nie. Om wiskunde te kan doen is dan soos om ‘n huis sonder ‘n fondasie te bou. Só ‘n huis sal verseker omval.

ALLE kinders kan wiskunde doen solank as die basiese vaardighede ontwikkel word.

Denke en probleemoplossing

‘n Kind se vermoë om te dink, help hom om sin te maak van dit wat hy sien, hoor, proe, ruik en voel. Op die manier begin hy om te verstaan hoe dinge werk en dat hy probleme kan oplos deur planne te maak. Wanneer ‘n kind besef hy KAN self planne maak, is die kind gereed vir die lewe en formele leer.